పడతులాల సోబాన పాడరమ్మా -- అన్నమాచార్య సంకీర్తనలు

489

రాగం: రామక్రియ

Download  (G. Bala Krishna Prasad Garu)

పడతులాల సోబాన పాడరమ్మా

అడరీ పెండ్లాడీనీ అహోబళేశుడు ||

ఎదురు కొండలమీద ఇందిర తాను కూచుండి

మదనకళలు రేగ మాటలాడి |

పదిలపు చూపులనే బాసికము కట్టుక

అదివో పెండ్లాడీనీ అహోబలేశుడు ||  

కనుసన్నల మెల్లనె కాగిటకి చేరి చేరి

చెనకులనే నవ్వులనే సేసలు చల్లి |

వెనుకొని మోపులను విందులు వెట్టుకొంటాను

అనిశము పెండ్లాడీనీ అహోబలేశుడు ||

సందడింపు వేడుకల సమరతులను గూడి

కందువ పెండ్లి పీటైన గద్దె మీదను |

అందమైన శ్రీ  వేంకటాద్రి గరుడాద్రిని

అందుకొనీ పెండ్లాడీనీ అహోబలేశుడు ||