అన్నమాచార్య సంకీర్తనలు---ఇదె శిరసు మాణిక్యమిచ్చి పంపె నీకు

రామాయణం లోని సుందరకాండలో...... హనుమంతుడు లంకలో ఉన్న  సీతమ్మ తల్లి జాడను కనిపెట్టి, ఆమెకు రాముని  ముద్రికను ఇచ్చి, ఆ తల్లి వద్దనుండి చూడామణిని తీసుకొని వచ్చి రామునికి ఆనందం కలిగిస్తాడు... అప్పుడు హనుమ రామునితో తాను ఆ తల్లిని ఎలా కనిపెట్టాను తదితర వివరాలను వివరించే ఆ సన్నివేశాన్ని శ్రీ తాళ్ళపాక అన్నమాచార్యులు ఎంతో చక్కగా ఈ పాటలో  వర్ణించారు....  దీనిని మీరు ఈ వీడియోలో పాటను వింటూ చదువుకోవచ్చు...

ఇదె శిరసు మాణిక్యమిచ్చి పంపె నీకు నాకె,
అదనెరిగి తెచ్చితి నవధరించవయ్యా ||

రామ నిను బాసి నీరామ నే చూడగ నా
రామమున నిను బాడె రామరామ యనుచు
ఆ మెలుత సీతయని యపుడునే తెలిసి
నీ ముద్ర వుంగరము నే నిచ్చితిని ||

కమలాప్త కులుడ నీకమలాక్షి నీ పాద
కమలములు తలపోసి కమలారి దూరె
నెమకి యాలేమను నీదేవి యని తెలిసి
అమరంగ నీసేమమటు విన్నవించితిని ||

దశరథాత్మజ నీవు దశశిరుని చంపి, యా-
దశనున్న చెలి గావు దశదిశలు పొగడ
రసికుడ శ్రీ వేంకట రఘువీరుడా నీవు
శశిముఖి చేకొంటివి చక్కనాయ పనులు ||